انا شاب عندي 29 سنة و عندي تجربة مع الإدمان و ألم الإدمان ....و من ضمن الألم ....... البحث عن التعافي و طبعا أول ما هفكر فيه  هو اني أروح لدكتور مختص ...يخلصني من التعب اللي انا فيه .......و دي بعض التجارب مع الأطباء اللي أنا بصراحة مستاء منهم جدا!!!!!!!

الطبيب الأول :

كنت قاعد بعاني من أعراض الإنسحاب في البيت و نفسي أبطل و أهلي عرضوا عليه اني أروح لدكتور و بعد شد وجذب مع أهلي و مع الفشل اللي كنت عايش فيه قولت و ماله أجرب هيحصل ايه يعني أكتر من خيبة الأمل اللي أنا فيها .

وأما روحت أنا وأخويا الى عيادة الطبيب النفسي ما كنش  أصلا عايز يدخلني عنده في غرفة الكشف علشان زهق من المدمنين و هيبطل يعالجهم و بعد محايلة من أخويا ....دخلت و عاملني بطريقة وحشة جدا و كتبلي على بعض المنومات و المهدءات و قاللي لو سمحت ما تدخلش تاني عندي ..تخيلوا...!!!! أنا رايح أصلا باحساس الفشل والإحباط و كان ده طوق النجاة بالنسبالي ....و لاقي رد الفعل ده و بالشكل ده.

الطبيب الثاني :

كان بيدخلني في مكان علاج عشان يعالجني من أعراض الإنسحاب ..و كان كل اللي يعملوا معايا التهديد اني لو ما بطلتش هيحصللي كوارث و اني ممكن أموت و حاجات زي كدة ...

و أنا أصلا بشوف بعيني أصحابي يموتوا من "اوفردوس"  "over dose"

والأمراض اللي بتيجي من حقن المخدر زي فيروس (B-C)،و الناس اللي ايديها اتقطعت من الحقن اللي أخدتها غلط و برغم كل ده ما كانش بيخلليني أبطل ،و كان الدكتور بيحاول معايا اني أقعد أكبر فترة ممكنة في المستشفى على أساس اني بكدة ممكن أنسى المخدرات ...و بصراحة بعد ما كنت بخرج بشرب علطول مش عشان أنا مش عايز أبطل ...لا ده عشان أنا مش عارف أسيطر على نفسي ،و دخلت اتعالج عند نفس الدكتور كذا مرة في المستشفى  ولما أطلع ارجع أشرب تاني ، ولما الدكتور احس بالفشل معايا كان بيقول لأهلي: بلغّوا عنه الشرطة أحسن اللي زيه لازم يتحبس في حتة لحد ما بيموت عشان ما يؤذي نفسه و لا يؤذي غيره .

و سالتي الى كل طبيب .....

عايز أقول إن الإدمان ده مرض ومحتاج علاج ..مش حكم بالموت أو الحبس و الدليل على كدة

الدليل الأول :

ان الإدمان مرض هو انه بكون فاقد السيطرة في حاجات كتير زي كان ممكن أموت أو أتسجن أو حتى أتجنّن!!! و مع كل ده كنت بشرب ...و مش عارف أبطل .

الدليل الثاني :

لما اتعالجت بطريقة صحيحة أصبحت و الحمد لله متعافى من الإدمان و الطريقة كانت هي إني دخلت مصحة و قابلت دكاترة على ثقافة ووعي بالمدمنين و علاجهم ...و قالوا لي على طريقة جديدة للتبطيل و هي" بيت التأهيل " و أول حاجة شدتني في الحكاية إن اللي حيعالجني مدمن مثلي حاسس بيّة بس متعافي و عامل كذا سنة تبطيل و ماشي على برنامج علاجي  ودي كانت أكبر رسالة أمل بالنسبة لية .

أنا ممتن جدا لكل طبيب يوجه مريضه الى بيوت التأهيل .....

و في النهاية :

أيها الطبيب انت حكمت عليّ بالموت و الحبس حتى تتخلص من فشلك في علاجي ...!!

أنا النهاردة شخص إيجابي في المجتمع باشتغل و ناجح في الشغل و الحمد لله، و بساعد المدمن اللي لسّة بيعاني، و عندي أمل في الحياة إني أعمل حاجات كتير تنفعني و تنفع الناس كلها و شكرا .